1 აპრილის შემდეგ ბიზნესი შეჩერებულ რეჟიმში? – „მეწარმეთა შესახებ“ კანონის 254-ე მუხლის სრული ანალიზი, სამართლებრივი შედეგები და ბიზნესის რისკები

ქონების დეკლარაციის წარდგენის ბოლო ვადა ფიზიკური პირებისათვის 1 ნოემბერია, გადახდის კი - 15 ნოემბერი

ფიზიკური პირების ქონების დეკლარაციის წარდგენის ბოლო ვადაა 2025 წლის 1 ნოემბერი, ხოლო გადახდის საბოლოო ვადა 15 ნოემბერია - განმარტავს ადმინისტრაციულ, სამოქალაქო საქმეებსა და ბავშვთა უფლებებში სპეციალიზებული ადვოკატი ნათია ნაკაშიძე.

საქართველოში ქონების გადასახადი მიბმულია შემოსავალზე. კერძოდ, თუ თქვენი და თქვენი ოჯახის წლიური შემოსავალი ჯამურად 40 000 ლარს აღემატება, და ამასთანავე, ფლობთ სახლს, მიწას ან ავტომობილს, თქვენ ვალდებული ხართ ბიუჯეტში ქონების გადასახადის გადიხადოთ.

სადვოკატო ბიურო „ნაკაშიძე და პარტნიორების“ დამფუძნებელი ნათია ნაკაშიძე დაინტერესებული ფიზიკური პირებისთვის განმარტავს, თუ როგორ წარადგინონ ქონების დეკლარაცია სწორად და დროულად.

დეკლარაციის წარდგენის ბოლო ვადაა 2025 წლის 1 ნოემბერი. დეკლარაცია საგადასახადო ორგანოს წარედგინება მხოლოდ ელექტრონული ფორმით გადასახადის გადამხდელის ავტორიზებული მომხმარებლის გვერდიდან.

2025 წელს უნდა წარადგინოთ 2024 წლის წლიური დეკლარაცია, ამიტომ პორტალზე არ შეცვალოთ დეკლარაციის პერიოდი.

წლევანდელ დეკლარაციაში აისახება:

ა) 2025 წლის 1 აპრილის მდგომარეობით თქვენს საკუთრებაში არსებული მიწა, აგრეთვე სახელმწიფოს ან მუნიციპალიტეტის საკუთრებაში არსებული მიწა, რომელსაც ფლობთ ან სარგებლობთ ამავე თარიღის მდგომარეობით.

ბ) 2024 წლის განმავლობაში თქვენს საკუთრებაში არსებული უძრავი ქონება (სახლი, ბინა, ავტოფარეხი, კომერციული ფართი), ასევე მსუბუქი ავტომობილები, იახტები, კატარღები, შვეულმფრენები და თვითმფრინავები.

თუ ქონება (გარდა მიწისა) 2024 წელს თქვენს საკუთრებაში იყო მხოლოდ ნაწილობრივი წლის განმავლობაში, ქონების გადასახადის გაანგარიშება მოხდება ამ პერიოდის პროპორციულად შესაბამისად იმ თვეების რაოდენობის, როცა ქონება თქვენს საკუთრებაში იყო.

დეკლარაციის ფორმაში უნდა მიუთითოთ ქონების ფლობის პერიოდი.

დასაბეგრი ქონების ღირებულება საგადასახადო ვალდებულება განისაზღვრება შემდეგნაირად:

• უძრავი ქონება: 2024 წლის ბოლოსთვის არსებული საბაზრო ღირებულების მიხედვით

• მიწა: 2025 წლის 1 აპრილისთვის არსებული ფართობის მიხედვით

  • არასასოფლო მიწა - კვ.მ-ით

  • სასოფლო მიწა - ჰექტრებით

გადასახადის განაკვეთს დეკლარაციაში სისტემა ავტომატურად შეარჩევს, გადასახადის ოდენობა კი ავტომატურად გამოიანგარიშება თქვენს მიერ წარდგენილი მონაცემების საფუძველზე.

ოჯახის წევრად ითვლება:

პირი, მისი მეუღლე, არასრულწლოვანი შვილი ან გერი, აგრეთვე მშობელი, შვილი, გერი, და, ძმა, ბებია, პაპა და შვილიშვილი, რომლებიც საერთო მეურნეობას ეწევიან. ოჯახის შემოსავლებში მოიაზრება ყველა სახის შემოსავალი, მათ შორის ხელფასი და სხვა სარგებელი, საგადასახადო შეღავათების გარეშე.

თუ ოჯახში ერთზე მეტ წევრს უწევს დეკლარაციის წარდგენა, შესაძლებელია ცალკე ან ერთობლივი საოჯახო დეკლარაციის წარდგენა.

დეკლარაციის გაგზავნის შემდეგ, პორტალი ავტომატურად გამოიანგარიშებს ქონების გადასახადს და თქვენს ავტორიზებულ გვერდზე წარმოაჩენს „საგადასახადო მოთხოვნას“, სადაც მითითებულია გადასახადის ოდენობა.

გადახდა ხორციელდება ბიუჯეტში, ნებისმიერი ბანკიდან, ერთიან სახაზინო კოდზე: 101001000

გადახდის ბოლო ვადაა 2025 წლის 15 ნოემბერი.

„გირჩევთ, არ გადადოთ დეკლარაციის წარდგენა ბოლო დღემდე. წინასწარ შეამოწმეთ ინფორმაცია პორტალზე და დარწმუნდით, რომ მონაცემები სწორადაა შევსებული. დაგვიანების შემთხვევაში კანონი ითვალისწინებს ჯარიმას და საურავს,“ - აღნიშნავს ადვოკატი ნათია ნაკაშიძე.

ქონების დეკლარაციის წარდგენა 2025 წელს წარმოადგენს სავალდებულო საგადასახადო ვალდებულებას, რომელიც ყველა იმ ფიზიკურ პირს ეკისრება, ვისი წლიური შემოსავალი 40 000 ლარს აღემატება და ფლობს უძრავ ან მოძრავ ქონებას.
დროული დეკლარირება და გადახდა დაგიცავთ ჯარიმებისგან და საგადასახადო პრობლემებისგან.

გარიგება - სასყიდლიანი გარიგება - უსასყიდლო გარიგება

გადასახადისათვის თავის არიდება / მომხმარებლის მოტყუება

ალიმენტის გადაუხდელობა საქართველოში - როგორ მოვიქცეთ, როცა ყოფილი მეუღლე ალიმენტს არ იხდის?

ალიმენტის გადაუხდელობა საქართველოში - როგორ მოვიქცეთ, როცა ყოფილი მეუღლე ალიმენტს არ იხდის? ამ თემაზე გვესაუბრება ადმინისტრაციულ, სამოქალაქო საქმეებსა და ბავშვთა უფლებებში სპეციალიზებული ადვოკატი ნათია ნაკაშიძე ,

შეკითხვა: „მე და ჩემი ყოფილი მეუღლე ოფიციალურად განვქორწინდით. სასამართლომ დააკისრა შვილისთვის ალიმენტი, მაგრამ არ იხდის. რა შეიძლება გავაკეთო?“

პასუხი: თუ ალიმენტი დაკისრებულია სასამართლოს მიერ და მაინც არ იხდება, პირველ რიგში მიმართეთ აღსრულების ეროვნულ ბიუროს და წარადგინეთ სააღსრულებო დოკუმენტი. ბიურო უფლებამოსილია გამოიყენოს იძულებითი ზომები: ქონებაზე ყადაღა, ანგარიშებისა და ხელფასის დაქვითვა, ქონების რეალიზაცია და მოვალის მონაცემების შეტანა მოვალეთა რეესტრში. დაჟინებული თავიდან არიდებისას შესაძლოა დადგეს სისხლისსამართლებრივი პასუხისმგებლობის საკითხიც სასამართლო გადაწყვეტილების შეუსრულებლობაზე.

რას ნიშნავს ალიმენტის ვალდებულება? საქართველოს სამოქალაქო კოდექსის მიხედვით, მშობლებს ევალებათ არასრულწლოვანი (და საჭიროების შემთხვევაში შრომისუუნარო) შვილების სარჩენად უზრუნველყოფა; ოდენობას სასამართლო განსაზღვრავს თითოეულ საქმეში ინდივიდუალურად.

ადმინისტრაციულ, სამოქალაქო საქმეებსა და ბავშვთა უფლებებში სპეციალიზებული ადვოკატი ნათია ნაკაშიძე , განმარტავს რომ პრაქტიკაში, გამონაკლისად, შესაძლებელია „წარსული დროის“ ალიმენტის დაკისრებაც ბოლო 3 წლის მონაკვეთში, როცა დადასტურებულია, რომ გადამხდელი თავს არიდებდა გადახდას.

რა იძულებით ზომები გამოიყენება პირის მიმართ ვინც ალიმენტს არ იხდის?

ხელფასიდან დაქვითვა: მოვალის დამსაქმებლის გავლით რეგულარული ჩამოჭრა.

ბანკებისა და ქონების დაყადაღება: უძრავ/მოძრავ ქონებაზე ყადაღის დადება და საჭიროებისამებრ რეალიზაცია

მოვალეთა რეესტრი: მოვალის მონაცემების შეტანა საჯარო სიაში .

იმ შემთხვევაში როდესაც პირი/მოვალე ალიმენტს შეგნებულად არ იხდის სამართლოსგადაწყვეტილების შეუსრულებლობა ან შესრულებისთვის ხელის შეშლა საქართველოს სისხლის სამართლის კოდექსის 381-ე მუხლით ისჯება. ანუ, თუ მოვალი განზრახ არ ასრულებს ალიმენტს, შესაძლებელია სისხლისსამართლებრივი მექანიზმის ამოქმედება (როგორც უკიდურესი ბერკეტი).

გჭირდებათ ინდივიდუალური დახმარება? დაგვიკავშირდით ახლავე!

დღგ-ის ციფრული მომსახურების პორტალი

საქართველოს ფინანსთა სამინისტროს შემოსავლების სამსახური გაცნობებთ, რომ საქართველოს საგადასახადო კანონმდებლობის შესაბამისად, თუ თქვენ არ ხართ დაფუძნებული, ან ჩვეულებრივ არ ცხოვრობთ საქართველოში ან/და არ გაგაჩნიათ საქართველოში ფიქსირებული დაწესებულება და საქართველოს ტერიტორიაზე ახორციელებთ ციფრული მომსახურების მიწოდებას, დღგ-ის გამოანგარიშების და გადახდის ვალდებულება საქართველოს ბიუჯეტში, წარმოგეშვებათ 2021 წლის 1 ოქტომბრიდან ნაცვლად 2021 წლის 1 ივლისისა.

საქართველოს საგადასახადო კოდექსის 1652 მე-2 ნაწილის ე) ქვეპუნქტის და საქართველოს ფინანსთა მინისტრის №996 ბრძანებით დამტკიცებული „გადასახადების ადმინისტრირების შესახებ“ ინსტრუქციის 471 მუხლის მიხედვით თქვენ მიერ საქართველოს ტერიტორიაზე არადასაბეგრ ფიზიკურ პირზე გაწეული ციფრული მომსახურებით მიღებული შემოსავალი ექვემდებარება დღგ-ის 18%-ით დაბეგვრას საქართველოში დღგ-ის გადამხდელად რეგისტრაციის გარეშე.

დღგ-ის ანგარიშგებისა და გადახდის მიზნით, უნდა დარეგისტრირდეთ შემოსავლების სამსახურის ვებგვერდზე განთავსებულ პორტალზე “VAT Portal on Digital Services ”.

საგადასახადო ვალდებულების შესრულების პროცედურასთან დაკავშირებით, გაითვალისწინეთ შემდეგი:

დღგ-ის გამოანგარიშებისა და გადახდის ვალდებულება წარმოიშვა 2021 წლის 1 ოქტომბრიდან მიწოდებულ ციფრულ მომსახურებებზე და საანგარიშო პერიოდია კვარტალი;

შემოსავლების სამსახურს, საგადასახადო დეკლარაცია უნდა წარედგინოს არაუგვიანეს საანგარიშო პერიოდის (კვარტლის) მომდევნო თვის 20 რიცხვისა;

გადასახადის გადახდა უნდა განხორციელდეს არაუგვიანეს საანგარიშო პერიოდის (კვარტლის) მომდენო თვის ბოლო დღისა;

ციფრული მომსახურების გაწევაში იგულისხმება, ტელესაკომუნიკაციო მომსახურება, ელექტრონულად გაწეული მომსახურება, რადიო ან ტელესამაუწყებლო მომსახურება.

გადასახადის გადახდა შესაძლებელია განხორციელდეს როგორც ეროვნულ ასევე უცხოურ ვალუტაში, კერძოდ, ლარში, დოლარში ან ევროში, რომლის არჩევაც ხდება დღგ-ის პორტალზე რეგისტრაციის დრო.

დღგ-ის განაკვეთი 18%.

შეგახსენებთ, რომ 2021 წლის პირველი საანგარიშო პერიოდია IV კვარტალი (1 ოქტომბრიდან 31 დეკემბრის ჩათვლით). საგადასახადო დეკლარაციის წარდგენის ბოლო ვადაა არაუგვიანეს 2022 წლის 20 იანვარი, ხოლო დღგ-ის თანხის გადახდა უნდა განხორციელდეს არაუგვიანეს 2022 წლის 31 იანვრისა (საგადასახადო ვალდებულების შესრულების თარიღად ითვლება გადახდილი თანხის სახაზინო სამსახურის შესაბამის ანგარიშზე ასახვის თარიღი).

წყარო:შემოსავლების სამსახური

მეწარმეთა შესახებ კანონში შესული ცვლილებები- შეტყობინების ჩაბარების წესის ცვლილება. გასაჩივრების უფლებამოსილება და ვადები

რა იცვლება “მეწარმეთა შესახებ” ახალი კანონით?

მეწარმეთა შესახებ კანონში 2022 წლის 1 იანვარს ძალაში შესული ცვლილებების შესახებ ისაუბრებს იურიდიული კომპანია ,, ნაკაშიძე და პარტნიორები“-ს დირექტორი, იურისტი ნათია ნაკაშიძე.

რა ცვლილებები განხორციელდა სამეწარმეო კანონმდებლობაში?

საქართველოს სამეწარმეო კანონმდებლობაში განხორციელდა არსებითი ცვლილებები, რომელიც 2022 წლის 1 იანვრიდან ძალაში შევიდა და ამოქმედდა.

მეწარმეთა შესახებ კანონი ფაქტობრივად სრულად ხელახლა დაიწერა, რაც სხვადასხვა მიზეზით იყო გამოწვეული.

მეწარმეთა შესახებ კანონი, პირველად 1994 წელს იქნა მიღებული და მასში მრავალი წლის განმავლობაში არაერთი ცვლილების მიუხედავად საკმაოდ მოძველებული და ბუნდოვანი იყო. საჭირო გახდა მისი ახლებურად მოწესრიგება და რაც მთავარია საქართველოს სამეწარმეო სამართლის დაახლოება ევროკავშირის კანონმდებლობასთან.

საქართველოს პარლამენტმა 2021 წლის 2 აგვისტოს მიიღო მეწარმეთა შესახებ ახალი კანონი, რომელიც ძალაში შევიდა 2022 წლის 1 იანვრიდან. კანონზე მუშაობა მიმდინარეობდა მრავალი წლის განმავლობაში, თუმცა მთავარი მამოძრავებელი ძალა აღნიშნული კანონის მიღების იყო საქართველოს ვალდებულება ევროკავშირის წინაშე. აღნიშნულ სიახლეებს მოგაწვდით ეტაპობრივად სტატიებში, ამჟამად განვიხილავთ,მხოლოდ მარეგისტრირებელი ორგანოს შეტყობინების ჩაბარების წესის,შეცილება. გასაჩივრების უფლებამოსილება და ვადები საკანონმდებლო ცვლილებებსა და სიახლეებს,რაც თითოეული კომპანიისთვის მნიშვნელოვანია, ვინაიდან გასაჩივრების ვადა არ შეიძლება დადგინდეს ადმინისტრაციული ორგანოს მიერ ადმინისტრაციულ-სამართლებრივი აქტის გამოცემის ვადის დარღვევის შემთხვევაში,ასევე ადმინისტრაციულ-სამართლებრივი აქტის გასაჩივრებისათვის დადგენილი ვადის გაშვების შემთხვევაში მისი აღდგენა შესაძლოა მოხდეს მხოლოდ მაშინ, თუ ამ ვადის გაშვება მოხდა დაუძლეველი ძალის ან სხვა საპატიო მიზეზით.

ადმინისტრაციული ორგანოს ქმედება, ზოგადი ადმინისტრაციული კოდექსის 180-ე მუხლის შესაბამისად, უნდა გასაჩივრდეს ერთი თვის ვადაში იმ დღიდან, როდესაც შესაბამისი დაინტერესებული მხარისათვის ცნობილი გახდა ამ მოქმედებათა განხორციელების ან განხორციელებისაგან თავის შეკავების შესახებ.

ზოგადად ადმინისტრაციული საჩივარი წარდგენილ უნდა იქნეს ადმინისტრაციულ-სამართლებრივი აქტის გამოქვეყნების ან ოფიციალური წესით გაცნობის დღიდან ერთი თვის ვადაში, თუ კანონმდებლობით სხვა რამ არ არის დადგენილი.

მაგ.კამერალური საგადასახადო შემოწმების აქტის საფუძველზე გმოცემული შემოსავლების სამსახურის აუდიტის დეპარტამენტის ბრძანება- გადასახადების/გადასახდელების და საგადასახადო სანქციების თანხების დარიცხვის/შემცირების შესახებ საქართველოს საგადასახადო კოდექსის 61-ე და 268-ე მუხლების თანახმად გამოცემულის გასაჩივრდება მოხდება საქართველოს საგადასახადო კოდექსის XIV კარით დადგენილი წესით, მისი ჩაბარებიდან 30 დღის ვადაში, საქართველოს ფინანსთა სამინისტროს სისტემაში - წერილობითი ან ელექტრონული (www.rs.ge) ფორმით საჩივრის შემოსავლების სამსახურში (მისამართი: ქ. თბილისი, ვ. გორგასლის ქ. N16 ან ქ. ქუთაისი, ჯავახიშვილის ქ. N5) წარდგენის გზით, აგრეთვე თბილისის საქალაქო სასამართლოში (მისამართი: ქ.თბილისი, დავით აღმაშენებლის ხეივანი N64) ან ქუთაისის საქალაქო სასამართლოში (მისამართი: ქ. ქუთაისი, კუპრაძის ქ. N11) საქართველოს კანონმდებლობით დადგენილი წესით.

მნიშვნელოვანია ის, რომ საჩივრის წარდგენის შემდეგ შემოსავლების სამსახურის საგადასახადო ბრძანება შეიძლება გასაჩივრდეს საქართველოს ფინანსთა სამინისტროსთან არსებულ დავების განხილვის საბჭოში (მის.: ქ. თბილისი, ვახტანგ გორგასლის ქ. No16) ან თბილისის საქალაქო სასამართლოში (მის.: ქ. თბილისი, დავით აღმაშენებლის ხეივანი No64), საქართველოს საგადასახადო კოდექსის XIV კარით დადგენილი წესის შესაბამისად, ამ ბრძანების ჩაბარებიდან 20 კალენდარული დღის ვადაში.

განხორციელებულია ცვლილებები, რომლებიც წინა კანონში არ იყო გათვალისწინებული, ან იყო, მაგრამ ახალი კანონში დაზუსტდა ან /და დაკონკრეტდა.

“მეწარმეთა შესახებ” ახალი კანონით მარეგისტრირებელი ორგანოს შეტყობინების ჩაბარების წესი

ახალი კანონი ითვალისწინებს მარეგისტრირებელი ორგანოს შეტყობინების ჩაბარების წესს.

მარეგისტრირებელი ორგანოს მიერ გაგზავნილი შეტყობინება ჩაბარებულად ჩაითვლება

1. მეწარმის მიერ გაცნობისთანავე;

2. იურიდიულ მისამართზე ჩაბარების მომენტიდან ან

3. ელექტრონულ მისამართზე განთავსებიდან მე-15 დღეს.

მეწარმეებთან საკომუნიკაციოდ და ელ. სერვისების მისაწოდებლად მარეგისტრირებელმა შექმნა ელ. პორტალი. ელექტრონულ მისამართად უწოდებენ ამ ელ. პორტალზე არსებულ მეწარმის ავტორიზებული მომხარებლის გვერდს. მოსალოდნელია, რომ ეს იქნება ისეთივე გვერდი როგორიცაა საგადასახადო ორგანოსთან გადასახადის გადამხდელის საკომუნიკაციო გვერდი https://rs.ge, რომელიც წარმატებით მუშაობს საქართველოში. ელექტრონული მისამართის არსებობა, მარეგისტრირებელ ორგანოსა და საზოგადოებას შორის კომუნიკაციას ბევრად მოსახერხებელს გახდის. სავარაუდოდ, მარეგისტრირებელი ორგანოს მხრიდან ფიზიკურად წერილის გაგზავნა მოხდება მხოლოდ უკიდურეს შემთხვევებში მოხდება, რაც გაცილებით ეფექტურს გახდის საკორპორაციო სამართლებრივი საკითხების სახელმწიფოს მხრიდან დარეგულირებას.

“მეწარმეთა შესახებ” ახალი კანონით შეცილება. გასაჩივრების უფლებამოსილება და ვადები

კანონში ცალკე თავი ეთმობა ხანდაზმულობას და შეცილებას, გასაჩივრების უფლებამოსილებასა და ვადებს. სიახლეა შეცილების უფლება, რომლის ზოგად ვადად 6 თვე განისაზღვრა. ნორმა განსაზღვრავს პირთა წრეს, რომლებსაც საერთო კრების გადაწყვეტილების, სამეთვალყურეო საბჭოსა და ხელმძღვანელი ორგანოს/ხელმძღვანელი პირის გადაწყვეტილების შეცილების უფლება აქვთ. სარჩელი შეცილების შესახებ შეტანილ უნდა იქნეს 1 თვის ვადაში (არაუგვიანეს გადაწყვეტილების მიღების დღიდან 6 თვისა), ხოლო თუ საერთო კრება კანონის ან წესდების მოთხოვნათა უხეში დარღვევით იქნა მოწვეული ან ჩატარებული − გადაწყვეტილების მიღების დღიდან არაუგვიანეს 1 წლისა. კანონი იმპერატიულად ადგენს, რომ გადაწყვეტილების გასაჩივრების გაშვებული ვადის აღდგენა დაუშვებელია.

„მეწარმეთა შესახებ“ საქართველოს ახალი კანონი ამოქმედდა.

2022 წლის 1 იანვრიდან „მეწარმეთა შესახებ“ საქართველოს ახალი კანონი ამოქმედდა.

ახალი კანონი სამეწარმეო საქმიანობის განმახორციელებელ პირთა დაფუძნების, რეგისტრაციის საკითხებსა და პროცედურებს მოაწესრიგებს.

კანონმდებლობიდან გამომდინარე, შეიქმნა ერთიანი ელექტრონული პორტალი, სადაც განთავსდება:

რეგისტრაციის შესახებ სააგენტოს გადაწყვეტილებები;
სარეგისტრაციო წარმოებასთან დაკავშირებული დოკუმენტები;
საზოგადოების მიერ კანონმდებლობის შესაბამისად გამოქვეყნებული ინფორმაცია.

კანონიდან გამომდინარე, საქართველოს იუსტიციის მინისტრის 2021 წლის 29 ნოემბრის N791 ბრძანებით დამტკიცდა სამეწარმეო საზოგადოებების სტანდარტული წესდებები, რომელთა გამოყენება საწარმოს სურვილის შესაბამისად შეეძლება.

ახალი რეგულაციებით, 2022 წლის 1 იანვრამდე რეგისტრირებულ სუბიექტებს განესაზღვრათ 2 წლის ვადა სარეგისტრაციო მონაცემების კანონთან შესაბამისობაში მოსაყვანად.

სუბიექტებს შესაძლებლობა ექნებათ საჯარო რეესტრის ეროვნულ სააგენტოს 2 წლის განმავლობაში მათთვის სასურველ დროს მიმართონ და შესაბამისი ცვლილებები განახორციელონ

ემიტენტებისათვის კორპორაციული მართვის კოდექსი დამტკიცდა

საქართველოს ეროვნულმა ბანკმა, მსოფლიო ბანკისა და საერთაშორისო საფინანსო კორპორაციის (IFC) აქტიური ჩართულობითა და თანამშრომლობით საჯარო ფასიანი ქაღალდების ემიტენტებისთვის კორპორაციული მართვის კოდექსი დაამტკიცა. ამის შესახებ Report.ge-ს ეროვნული ბანკიდან აცნობეს.

გავრცელებული ინფორმაციით, კოდექსის მთავარი მიზანი საწარმოებისათვის პასუხისმგებლობის გაზრდის ხელშეწყობა, დაინტერესებულ მხარეებთან აქტიური კომუნიკაცია, გამჭვირვალობისა და ინვესტორთა უფლებების დაცვაა. მათი ცნობით, ეს, ერთი მხრივ, ხელს შეუწყობს საწარმოებს გრძელვადიანი მიზნების მიღწევაში, ხოლო, მეორე მხრივ, გაზრდის ინვესტორთა ნდობას საწარმოსადმი და საბოლოოდ, მნიშვნელოვან როლს შეასრულებს ადგილობრივი და უცხოური ინვესტიციების მოზიდვაში.

„საქართველოში კორპორაციული მართვის საბაზისო სტანდარტები სხვადასხვა საკანონმდებლო აქტითაა დადგენილი. შესაბამისად, საწარმოებს უკვე აქვთ ვალდებულება სრულ შესაბამისობაში იყვნენ აღნიშნულ მოთხოვნებთან. თუმცა, 2020 წელს, “ფასიანი ქაღალდების ბაზრის შესახებ“ საქართველოს კანონში საჯარო ფასიანი ქაღალდების ემიტენტების კუთხით განხორციელებულმა ცვლილებებმა ცხადყო, რომ აუცილებელია კორპორაციული მართვის კოდექსის შემუშავება, რომელიც უფრო ნათლად წარმოაჩენდა იმ ორგანიზაციულ მოთხოვნებს, რომლებსაც საწარმოები უნდა აკმაყოფილებდნენ.

„საჯარო ფასიანი ქაღალდების ემიტენტებისათვის კორპორაციული მართვის კოდექსი“ ასახავს საწარმოებისადმი დადგენილ მოთხოვნებსა და ანგარიშგების წარმოდგენის პროცესს. კოდექსი ეფუძნება მიდგომას – „შეასრულე ან განმარტე და წარმოადგინე ალტერნატივა“, რომელიც მოითხოვს კოდექსით დადგენილ პრინციპებთან მიმართებაში ემიტენტების კორპორაციული მმართველობის მიდგომების გამჟღავნებას და მიზნად ისახავს ხელი შეუწყოს კორპორაციული მართვის საუკეთესო პრაქტიკის ფართოდ გამოყენებას.

კოდექსი შემუშავებულია საუკეთესო საერთაშორისო პრაქტიკაზე დაყრდნობით. მასში გათვალისწინებულია სხვადასხვა ქვეყნის, საერთაშორისო ორგანიზაციისა და ევროკავშირის სტანდარტები, მათ შორის ეკონომიკური თანამშრომლობისა და განვითარების ორგანიზაციის (OECD) კორპორაციული მართვის პრინციპები. ასევე, ევროკომისიის 2014 და 2015 წლის რეკომენდაციები.

კორპორაციული მართვის კოდექსი 2022 წლის იანვრიდან შევა ძალაში. კოდექსით განსაზღვრულ ანგარიშგებებს საწარმოები 2023 წლის წლიური ანგარიშის წარდგენის თარიღისთვის წარმოადგენენ“,– ნათქვამია განცხადებაში.

წყარო:emigrantebi.ge

ფინანსთა სამინისტროს შემოსავლების სამსახური გადასახადის გადამხდელებს საქონლის გაფორმების ახალ დაჩქარებულ შესაძლებლობას სთავაზობს

გადასახადის გადამხდელთა ხელშეწყობის მიზნით, ფინანსთა სამინისტროს შემოსავლების სამსახურის მიერ, საქონლის გაფორმებისა და გაშვების ფორმალობების გამარტივების მიზნით, ინიცირებულია ცვლილებები საბაჟო კანონმდებლობაში, რომლის თანახმადაც, 15 დეკემბრიდან, გადასახადის გადამხდელებს საქონლის გაფორმების ახალი დაჩქარებული შესაძლებლობები ეძლევათ, - ამის შესახებ ინფორმაციას ფინანსთა სამინისტროს შემოსავლების სამსახური ავრცელებს.

მათივე ინფორმაციით, საბაჟო დეკლარაციის დამუშავებისას, მასში მითითებული მონაცემების იმპორტის გადასახდელზე ვალდებულების შესრულების რისკის პროფილთან თანხვედრის შემთხვევაში, საგრძნობლად შემცირდება საქონლის თავისუფალ მიმოქცევაში გაშვებისთვის საჭირო დრო.

კომერციულ ბანკებთან გაფორმებული მემორანდუმების საფუძველზე, შემოსავლების სამსახურისთვის ონლაინ რეჟიმში, მყისიერად, ხელმისაწვდომი იქნება ინფორმაცია გადასახადის გადამხდელის მიერ, საბანკო დაწესებულებაში განხორციელებული სახაზინო გადარიცხვები. შესაბამისად, დეკლარანტის მიერ, წარმოსადგენ გადახდის დოკუმენტს ჩაანაცვლებს ბანკის მიერ ელექტრონულად მოწოდებული ინფორმაცია, რომელზე დაყრდნობითაც შესაძლებელი იქნება საქონლის დაუყოვნებლივ გაშვება თავისუფალ მიმოქცევაში.

ამასთან, ახალი ცვლილებები, ასევე მნიშვნელოვნად დააჩქარებს წინასწარ დეკლარირებული საქონლის თავისუფალ მიმოქცევაში გაშვების ფორმალობებსაც. კერძოდ: სხვადასხვა ტვირთის საქართველოს ტერიტორიაზე შემოტანისას, საბაჟო დეკლარაციაში მითითებული მონაცემების იმპორტის გადასახდელზე ვალდებულების შესრულების რისკის პროფილთან თანხვედრის შემთხვევაში, საბაჟო გამშვები პუნქტი თავად განახორციელებს საქონლის გაშვებას (ცვლილებამდე, კუთვნილი იმპორტის გადასახდელის სრულად/ნაწილობრივ გადახდა დეკლარაციის დამუშავებიდან 1 საათის განმავლობაში დადასტურდება გადახდის დამადასტურებელი დოკუმენტის წარდგენით ან საბანკო დაწესებულებიდან ელექტრონული ფორმით მიღებული ინფორმაციით).

აღსანიშნავია, რომ გადასახადის გადამხდელების ინტერესებიდან გამომდინარე, იმ შემთხვევაში, თუ გარკვეული მიზეზების გამო, საბაჟო გამშვები პუნქტი ვერ განახორციელებს ტვირთის თავისუფალ მიმოქცევაში გაშვებას, ამ პროცედურას შეასრულებს საბაჟო დეპარტამენტის საბაჟო კონტროლის ორგანიზაციის სამმართველო შემდეგი პირობების გათვალისწინებით, თუ - წარდგენილი იქნება კუთვნილი იმპორტის გადასახდელის შესაბამისი თანხის ოდენობის გარანტია, ან კუთვნილი იმპორტის გადასახდელის გადახდა დადასტურდება საბანკო დაწესებულებიდან ელექტრონული ფორმით მიღებული ინფორმაციით, ან იმპორტის გადასახდელის ნაწილზე წარდგენილი იქნება გარანტია და დანარჩენი ნაწილის გადახდა დადასტურდება საბანკო დაწესებულებიდან ელექტრონული ფორმით მიღებული ინფორმაციით.

აქვე აღვნიშნავთ, რომ დეკლარანტს საქონლის გაშვების შესახებ ინფორმაცია, გაეგზავნება მოკლე ტექსტური შეტყობინების სახით, სისტემაში რეგისტრირებული მობილური ტელეფონის ნომერზე.

სწორედ, აღნიშნული ცვლილების გაცნობის მიზნით, გაიმართა შეხვედრა კომერციული ბანკებისა და სხვადასხვა ბიზნეს ასოციაციის წარმომადგენლებს შორის, რომელსაც ესწრებოდნენ შემოსავლების სამსახურის უფროსის მოადგილეები ვლადიმერ ხუნდაძე და ლევან წითელაშვილი, ასევე საბაჟო დეპარტამენტის ხელმძღვანელი ზურაბ სიჭინავა და საინფორმაციო ტექნოლოგიების ცენტრის უფროსი ნოდარ კაკრიაშვილი.

საქართველოში მოქმედ რამოდენიმე საბანკო დაწესებულებასთან, უკვე გაფორმდა თანამშრომლობის შესახებ მემორანდუმები (,,საქართველოს ბანკი“, „თიბისი ბანკი“, „ლიბერთი ბანკი“, „პაშა ბანკი“, „ბანკი ქართუ“ და „სილქ როუდ ბანკი“), ხოლო შემდგომ ეტაპზე, საქართველოში მოქმედი ყველა კომერციული ბანკი ჩაერთვება აღნიშნულ პროცესში.

წყარო:imedinews.ge